PROF. MANYA: MABADILIKO YA SHERIA YA MADINI NI KUMSAIDIA MCHIMBAJI MDOGO

 

Naibu Waziri wa Madini, Prof. Shukrani Manya akizungumza

jambo katika mkutano na wachimbaji wadogo wa madini ya dhahabu ya

Handali yaliopo Chamwino Mkoani Dodoma.

Baadhi ya wachimbaji wadogo wa madini dhahabu wa Handali

yaliopo Chamwino Mkoani Dodoma walioshiriki Mkutano na Naibu Waziri wa

Madini Prof. Shukrani Manya.

 Naibu Waziri wa Madini Prof. Shukrani Manya akisaini

 kitabu cha wageni katika Ofisi ya Mtendaji wa Kijiji cha

Handali.

Naibu Waziri wa Madini Prof. Shukrani Manya akijadili jambo

na baadhi ya wachimbaji wadogo wa madini ya dhahabu katika mgodi wa

Handali yaliopo Chamwino Mkoani Dodoma.

Na Tito Mselem, Dodoma

DHANA ya Serikali kufanya mabadiliko ya Sheria ya Madini ya Mwaka 2010

na Marekebisho yake ya Mwaka 2017 ni kuwawezesha wachimbaji wadogo wa

madini kuchimba kwa tija na kuzalisha kwa faida.

Kauli hiyo, ameitoa Naibu Waziri wa Madini Prof. Shukrani Manya

alipotembelea Mgodi wa Handali uliopo Wilaya ya Chamwino jijini Dodoma

ambapo alizungumza na kutatua kero za wachimbaji wadogo katika Mgodi

huo.

Imeelezwa kuwa Mgodi wa Handali ulianza miezi sita iliyopita na

ulianza kama mlipuko wa madini ya dhahabu (Rush), ambapo mpaka sasa

una mialo 28 kalasha 30 na umeweza kuvuna dhahabu ya Uzito wa Gramu

816.77 yenye thamani ya Shilingi 89,293,000/- na dhahabu inayopatikana

eneo hilo ina kiwango cha ubora cha asilimia 80.

Aidha, Prof. Manya amesema, Shughuli za madini zimeimarishwa ambapo

kila Mkoa kuna Afisa Madini Mkazi ambaye yupo eneo husika kwa ajili ya

kuwasaidia wachimbaji wadogo wa madini wa Mkoa husika.

“Niwaombe wachimbaji wadogo wa madini kote nchini kuzitumia Ofisi za

Maofisa Madini Wakazi katika maeneo yenu ili wawape ufafanuzi wa

changamoto yoyote katika maeneo yenu na myatumie Masoko ya Madini

yaliopo sehemu mbalimbali nchini kuuzia na kununulia madini yenu na

kwa yoyote atakaye kiuka atachukuliwa hatua za kisheria ikiwemo

kufilisiwa, faini, kwenda jela, au kufutiwa leseni na kuzuiliwa

kujihusiha na shughuli yoyote inayohusiana na Madini,” alisema Prof

Manya.

Pia, Prof. Manya amewataka wachimbaji wadogo wa madini nchini

kupendana, kushirikiana, kuthaminiana na kuachana na wivu, fitina na

majungu ili wafanye shughuli zao kwa tija ambapo mpaka sasa Serikali

imewawekea mazingira wezeshi wachimbaji wadogo na kuimarisha

ushirikiano kati ya Wizara ya Madini na Mikoa, Wilaya mpaka kwenye

ngazi ya Vijiji katika shughuli za madini.

Vile vile, Prof Manya amemuagiza Afisa Madini Mkazi wa Mkoa wa Dodoma

Nchangwa Marwa kutoa elimu ya Uchimbaji Salama kwa wachimbaji wadogo

katika mgodi huo, ambapo alisema hayo kutokana na mvua za masika

zinazoendelea kunyesha nchini kote.

Katika hatua nyingine, Prof. Manya, amewataka madalali wote wa madini

(Brocker) kuhakikisha wanafanya biashara na wawe na leseni za biashara

ya madini ambaye hana alielekezwa amuone Afisa Madini Mkazi wa Mkoa

huo.

Naye, Mkuu wa Wilaya Chamwino Vumilia Chamiga alimshukuru Prof. Manya

kwa kusikiliza na kuzitatua kero za wachimbaji wadogo wa Mgodi huo na

kuahidi kwamba atashirikiana na Ofisi ya Afisa Madini Mkazi wa Mkoa wa

Dodoma ili watoe elimu ya Uchimbaji Salama hasa katika kipindi hiki

cha mvua.