KIKWETE AWAAMBIA WATANZANIA DK.MAGUFULI ATASHINDA KWA KISHINDO, AMSIFU KWA KULETA MAENDELEO MAKUBWA NCHINI

 Na Said Mwishehe, Michuzi TV-Bagamoyo

RAIS Mstaafu katika Serikali ya Awamu ya Nne Jakaya Kikwete amesema chini ya uongozi Rais Dk.John Magufuli nchi ameiongoza ameongoza vizuri mengi mazuri yamefanyika, hivyo wananchi wataionesha shukrani yao kwa kumchagua kwa kishindo katika Uchaguzi Mkuu unaotarajia kufanyika Oktoba 28 mwaka huu.

Kikwete amesema hayo leo katika mkutano wa kampeni za mgombea urais kwa tiketi ya CCM Dk.Magufuli aliyefika kwa wananchi wa Wilaya ya Bagamoyo mkoani Pwani kuwaomba ridhaa ya kuongoza nchi kwa miaka mitano mingine ili aendelee kuleta maendeleo zaidi ya yaliyofanyika miaka mitano iliyopita.

Akizungumza zaidi mbele ya maelfu ya wananchi hao na mgombea urais wa CCM, Kikwete amesema wananchi wanatambua kazi ambayo imefanywa na Rais Magufuli, hivyo hana shaka hata kidogo kuwa atashinda kwa kishindo."Wananchi wataionesha shukrani yao kwako kwa kukupa kura nyingi.

"Endelea kupambana na endelea kuamini hakuna kitakachoharibika, hapa Bagamayo wagombea ubunge wameelezea vizuri sana yale ambayo yamefanyika, nchi imepiga hatua kubwa kuliko wakati nakukabidhi nchi, na kubwa zaidi nchi imetulia".

Kikwete amempa pole na hongera Dk.Magufuli na kwamba mpaka sasa sasa amefanya kazi kubwa na nzuri, ameendesha kampeni vizuri."Sina wasiwasi utashinda, utashinda, utashinda sana na Chama chetu kitashinda, sioni hofu wala sababu ya CCM kushindwa, mgombea urais kushindwa, wabunge wengi na madiwani kushindwa.

"Nakupa pole kwa kazi kubwa unayofanya ya kampeni, nimeifanya, naijua ugumu wake, naijua adha yake, lakini naijua raha yake.Unakuwa umechoka sana lakini ukikuta wana CCM wamejaa , wanafuraha roho yako inakuwa baridi".

Wakati anaanza kuzungumza katika mkutano huo, Kikwete alimwambia Dk.Magufuli kwamba baada ya kupata taarifa kuwa leo atakuwa Bagamoyo mkoani Pwani aliona ni vema naye akawepo."Nikasema lazima niungane na wana Bagamoyo, hapa mimi ni nyumbani kabisa tena kwa kuzaliwa, hivyo nimeungana na wana Bagamoyo wenzangu na Wana Pwani kukukaribisha, kukupongeza na kukupa pole."

 

Mgombea Urais kupitia Chama cha Mapinduzi CCM Rais Mheshimiwa Dkt. John Pombe Magufuli akizungumza na Wananchi wa Bagamoyo katika Mkutano wa Kampeni za CCM kwa upande wa Urais uliofanyika katika uwanja wa Mwanakelenge Bagamoyo mkoani Pwani leo tarehe 19 Oktoba 2020.Rais Mstaafu wa Awamu ya Nne Dkt. Jakaya Mrisho Kikwete akipiga makofi wakati akisikiliza hotuba ya Mgombea Urais kupitia Chama cha Mapinduzi CCM Rais Mheshimiwa Dkt. John Pombe Magufuli katika Mkutano wa Kampeni za CCM kwa upande wa Urais uliofanyika katika uwanja wa Mwanakelenge Bagamoyo mkoani Pwani leo tarehe 19 Oktoba 2020.

Mgombea Urais kupitia Chama cha Mapinduzi CCM Rais Mheshimiwa Dkt. John Pombe Magufuli akiwasili Bagamoyo mkoani Pwani kwa ajili ya kuwahutubia wananchi katika muendelezo wa Kampeni za Chama cha Mapinduzi CCM leo tarehe 19 Oktoba 2020.