RAS MKOA WA PWANI INJINIA HAJAT MWANASHA AHIMIZA KUKUSANYA USHURU KIBAHA MJI, MKURANGA NA CHALINZE

 

Na Linda Shebby , Kibaha

KATIBU Tawala  wa  Mkoa wa Pwani(RAS)  Injinia Hajat  Mwanasha  Tumbo amewataka viongozi wa Halmashauri tatu ambazo ni  Kibaha Mji, Mkuranga na Chalinze kuzingatia misingi ya ukusanyaji ushuru  ndani ya Mkoa  huku akiwasisitiza Wakurugenzi  kusimamia misingi ya uwajibikaji jamii  .

Injinia Mwanasha amesema hayo leo alipokuwa akifungua  mafunzo  ya kuwajengea uwezo  viongozi wa ngazi mbalimbali za Halmashauri hizo tatu kuhusu mradi wa  GIZ unaofadhiliwa na nchi za Ujerumani ,  Usiwis  (Switzerland)na Umoja wa Ulaya.

"Tumejipanga  kuwajengea uwezo  kwenye  mifumo ya kiufundi, utawala wa kisheria ,masuala ya fedha na tehama Ili kudhibiti mianya yote ya wakwepa ushuru" alisema  Injinia (RAS) Mwanasha.

Injinia Mwanasha (RAS)  aliongeza kwa kusema  anatamani  kuziona  Halmashauri hizi tatu za Mkoa wa Pwani  zikijitegemea  jambo ambalo litasaidia kupunguza mzigo wa kwa serikali na kuweza kujimudu kwa kufanya mambo mbalimbali ya msingi ndani ya Halmashauri husika.

"Mapato yanaongeza  usalama  na amani  ndani ya Halmashauri hivyo nina amini ukusanyaji wa ushuru utazingatia weledi Mkoa wa Pwani utakua mkubwa kiuchumi   kwa sababu  Pwani inasifika  kwa kuwa na Viwanda na wawekezaji wengi,  hali ya  ukusanyaji  ushuru kwa sasa  ni zaidi ya asilimia 80  hivyo tunaamini  kuwa tuna uwezo wa kukusanya ushuru  kwa asilimia 100" alisema RAS Injinia Mwanasha.

Akizungumza kuhusu changamoto za ukusanyaji ushuru   Mkoa wa Pwani RAS Injinia Mwanasha alisema kuwa anaonya kutokuwepo na migogoro katika kuendeleza zoezi hilo la kukusanya ushuru na kwa yeyote atakayekwenda kinyume na taratibu zilizowekwa na serikali atachukuliwa hatua Kali.

Wakati huohuo Mtaalamu  Mshauri wa Mapato GIZ Raymond Nzali  alisema kuwa wa Ujerumani, Uswis na Umoja wa Ulaya wako Kibaha  kutengeneza  mpango kazi  wa shughuli ya mapato kwasababu wameona kuna haja ya kuimarisha  ukusanyaji wa mapato.

"Tumelenga zaidi katika ukusanyaji wa ushuru  wa huduma, ukilinganisha ushuru wa huduma uko chini kwa asilimia 12 , kati ya biashara zote ina maana kwamba kuna wigo mpana wa mapato ambayo hayakusanywi ipasavyo" alisema Nzali.