ALI KIBA APATA PIGO, WASANII WAKE WAWILI WAMKIMBIA

Charles James, Michuzi TV

PIGO! Ndivyo unavyoweza kusema baada ya wasanii wawili, Killy na Cheesy kutoka Lebo ya Kings Music inayomilikiwa na Supastaa, Ali Kiba kutangaza kujitoa kwenye lebo hiyo.

Taarifa za kujitoa kwa wakali hao zimeanza kusambaa leo baada ya wasanii hao wenyewe kuandika kwenye mitandao yao ya Instagram lakini hawajaweka sababu za kujitoa kwao.

" Naitwa Ally Killy maarufu kama Lilly nikijulikana kama msanii wa Kings Music Records, napenda kuwajulisha fans wangu wote waliokua wakonisupport mziki wangu na wanaoendelea kusupport kazi zangu na hata wasionisupport pia kwamba kuanzia leo hii napenda kutamka kuwa mimi sio msanii tena wa Kings Music, nimeamua hili kwa akili yangu kabisa bila kushawishiwa na mtu yoyote wala sijatumia kilevi chochote, hii ni kwa ajili ya muendelezo wa mziki wangu.

Ali Kiba amekua ni mtu muhimu sana kwenye maisha yangu amenionesha njia na kuniaminisha mimi pamoja na muziki wangu mbele ya jamii, Inshallah Mwenyezi Mungu amlipe kwa kila alichonifanyia na kujitolea kwa ajili ya Muziki wangu, namshukuru sana na sitoacha kumshukuru na ninaumia sana ila sina budi, Nakupenda sana my brother, " Ameandika Killy.

Kwa upande wake nae msanii Cheedy ametumia ukurasa wake wa Instagram kutangaza kwake kung'atuka kwenye lebo hiyo ambapo nae kama ilivyo kwa Killy ameeleza shukrani zake kwa Ali Kiba huku akimuomba amuombee dua kwenye safari yake ya muziki.